Rövşən Rzayev: “Sərkisyan
rejimi birmənalı şəkildə devriləcək”
Əvəz Həsənov: “Burada müəyyən qədər Köçəryanın maraqları görünür”
Ermənistanda elektrik enerjisinin
istehlak qiymətlərinin artırılması əhalinin ciddi narazılığına səbəb olmaqla
yanaşı, həm də etiraz aksiyalarının dayanmadan davam etməsinə gətirib
çıxarıb.
Amma əhalini birdən-birə küçələrə
çıxmağa vadar edən, həqiqətənmi, elektrik enerjisinin qiymətinin artımı
oldu?
Məsələyə münasibət bildirən millət
vəkili Rövşən Rzayev deyib ki, erməni xalqına düşmən mövqedə olan, şəxsi
maraqlarını güdən Sərkisyan rejimi devrilərsə, Ermənistan bir dövlət kimi
konstruktiv bir mövqeyə gələrsə, onda bu ölkə Azərbaycanla münasibətləri
hesabına müəyyən qədər iqtisadiyyatını düzəldə və əhalisi normal yaşaya bilər. Onun sözlərinə görə, əgər bunu edə bilməyəcəklərsə,
onda problemləri daha da dərinləşəcək: “Bununla bağlı hələ bir neçə ay bundan
öncə bildirmişdim. Sərkisyan rejimi birmənalı şəkildə devriləcək. Çünki bu
rejim orta əsr düşüncəsində olan insanların əlindədir. Bu rejim Azərbaycan ərazilərini
işğal etməklə Ermənistanın siyasi hakimiyyətini işğal edib. Ona görə də bu, Ermənistana
heç nə vəd vermir.
Əlbəttə, onları qoruyan qüvvələr var. Amma artıq Ermənistanda xalqın bir çox nümayəndələri məsələni aydın
başa düşür. Tez-gec bu rejimin çökməsinin şahidi olacağıq və bu, bölgəyə sülh gətirəcək
bir amil olacaq”.
R.Rzayev qeyd edib ki, Ermənistan bütün istiqamətlərdə böhran içindədir:
“Təkcə elektrik enerjisi problemi deyil. İnsanlar
normal həyat sürmək istəyirlər, amma əksini görürlər. Onlar şahidi olurlar ki,
Ermənistan gəncləri özlərinə aid olmayan, işğal olunan torpaqlarda hərbi xidmət
keçirlər. Təbii ki, təmas xəttində Azərbaycan Silahlı Qüvvələri onlara aman
vermir. Onlar birmənalı məğlubdurlar və həyatlarını itirirlər. Digər tərəfdən
Ermənistan iqtisadiyyatı çöküb və bu ölkədə müstəqil adında heç bir şey yoxdur.
Ermənilər həm müstəqil dövlət, həm də firavanlıq istəyirlər. Ermənistan
regionda ya iqtisadi bir zona kimi, ya da normal ölkə olaraq yaşamalıdır. Amma əksinə Ermənistan
regiona problem, separatçılıq, terrorizm və bu kimi halları ixrac edir. Bu da təbii
ki, regiona və ilk növbədə Ermənistan xalqına problemlər yaradır.
Azərbaycan möhtəşəm və tarixdə
ilk dəfə olaraq I Avropa Oyunlarının bağlanışını elan etdi. Bunu Azərbaycan
xalqına ulu öndər Heydər Əliyevin siyasəti gətirib. Prezident İlham Əliyevin fəaliyyəti
nəticəsində bu xoş günləri yaşadıq. Amma Ermənistanda xalqın necə yaşadığını
bilmək üçün heç də böyük siyasi biliyə malik olmaq lazım deyil. Azərbaycanın
inkişafını Ermənistan da, dünya ölkələri də görür. Ermənistanda hakimiyyətə
xalqı, dövləti istəyən adam gələrsə, həmin şəxs konstruktiv mövqeyi gətirəcək və
biz də öz problemimizi həll edəcəyik”.
Konfliktoloq Əvəz Həsənov
bildirib ki, aksiyaların başlıca səbəbi Ermənistanda elektrik enerjisinin 40
faiz qaldırılmasıdır. Onun sözlərinə görə, bu artım ermənilərin büdcələrinə
ağır zərbə oldu: “Mən Ermənistandan olan vətəndaş cəmiyyəti nümayəndələri,
politoloqlarla söhbət elədim və onlar bu etirazların əsasında məhz elektrik
enerjisinin qiymətinin artırılmasının dayandığını qeyd etdilər. Çünki Ermənistan
cəmiyyətinin iqtisadi cəhətdən zəif bir vəziyyətində elektrik enerjisinin qiymətinin
artırılması onlar uçun böyük bir zərbə idi.
Bildiyimiz kimi, Serj Sərkisyan
ikinci dəfə prezidentliyindən sonra namizədliyini verməyəcək və indi Ermənistanda
istənilən siyasi mübarizədə Köçəryanın marağı olduğu görünür. Ola bilsin ki,
Köçəryan da aksiyaların provokasiya olunmasında müəyyən qədər rol oynaya bilər”.
Ə.Həsənov bildirib ki, Ermənistanda elektrik enerjisinin
istehsalı Anatoli Çubaysın rəhbərlik etdiyi “RAO EES” şirkətinə məxsusdur. Onun
sözlərinə görə, bu şirkət artıq Rusiyada fəaliyyətini dayandırıb: “Ermənistanda
isə əlavə şirkəti qalıb. Burada müəyyən qədər Köçəryanın maraqları
görünür.
Hazırda Rusiya Ermənistanın həm
aparıcı şirkətlərini, həm də gəlir gətirən sahələrini əlindən alıb. Bu mənada
Rusiya başa düşəcək ki, Ermənistanda antirus meyllərin artmasına və gələcəkdə həm
də Ermənistanın oyun oynamasına böyük təkan verə bilər. Çünki bu ölkə hazırda
Avropa Birliyi ilə oyun oynayır və göstərmək istəyir ki, Rusiya ilə Avrasiya
İttifaqına imza atıb, ancaq müəyyən məsələlərdə Avropa Birliyi ilə əlaqələrin bərpa
olunmasına razıdır. Həqiqətən də, qəribə oyunlar gedir və hesab edirəm ki, Azərbaycanda
bunu ciddi dəyərləndirmək lazımdır. Yəni, bu hadisələrə təkcə meydan damğası
vurub, demək olmaz ki, burada hansısa siyasi tələblər gedir. Ermənistanda
hansısa siyasi tələbə ehtiyac yoxdur, ona görə ki, bu ölkədə əhali sosial
problemlərlə ayağa qalxacaq. Amma səhəri günü Ermənistan üçün problem
yaranarsa, millət yenidən birləşəcək. Xüsusilə, ermənilərin müstəqilliyin və ya
Qarabağın itirilməsi məsələsində birləşməsi ehtimalı daha çoxdur. Ona görə də
burada iqtisadi tələblərin irəli sürüldüyü mitinqlərin uğuru daha da yüksək
olacaq. Əgər bu Köçəryanın planlaşdırdığı bir işdirsə, həqiqətən yaxşı
hesablamalar aparıb. Çünki Sərkisyan artıq gedir. Ona görə də Köçəryana
lazımdır ki, yenidən Dağlıq Qarabağ planını aktuallaşdırsın və göstərsin ki,
Ermənistanda daha stabil və Rusiya ilə münasibətləri ən güclü olan klanlardan
biri Qarabağ klanıdır. Yəni, Köçəryanın
özüdür”.
http://teleqraf.com/news/61030
Комментариев нет:
Отправить комментарий