İki ilə yaxın hazırlıq və iri büdcəsi ilə tanınan ilk Avropa
Oyunları başa çatdıqdan sonra diqqət, Azərbaycanın iqtisadi vəziyyətindədir.
Bəzi təhlilçilər deyir ki,
Azərbaycanın ev sahibliyini etdiyi ilk Avropa Oyunlarının iqtisadiyyata təsiri
hələ özünü biruzə verməsə də, fəsadları bir müddətdən sonra görünəcək. Digərləri
isə, milli iqtisadiyyatın vəziyyətilə Avropa Oyunları arasında heç bir əlaqə
görmür.
İlk dəfədir Azərbaycanda keçirilən
#Baku2015 Avropa Oyunları 12-28 iyun tarixində Bakıda baş tutub. Bazar ertəsi,
gənclər və idman naziri Azad Rəhimov bildirib ki, Oyunların ümumi büdcəsi 960
milyon manat olub.
BBC Azərbaycancanın hesablamaları bu
rəqəmin 5 milyard manata yaxın olduğunu göstərib. Çünki 2013, 2014 və 2015-ci
illərin büdcəsindən də hazırlıq prosesinə vəsait ayrılıb.
Fəsad, yoxsa strateji
sərmayə?
"Bir müddət keçdikdən sonra
bunun fəsadlarını görəcəyik, çünki xərcləmələr həddindən artıq böyük idi",
iqtisadçı Natiq Cəfərli BBC Azərbaycancaya bildirir.
Cənab Cəfərliyə görə, indi hiss
edilməsə də, gəlirlərin "kəskin" azaldığı bir dövrdə fəsadlar
proqnozlaşdırıla bilər.
"Müvəqqəti iş yerləri yarandı,
obyektlər tikildi, yollar təmin olundu, indi isə, Avropa oyunları bitdikdən
sonra, həm infrastruktur layihələri azalacaq, həm də oyunların təşkilatına cəlb
olunmuş minlərlə insan işsiz qalacaq", Cəfərliyə görə, Oyunların
iqtisadiyyata ilk təsirləri bunlardır.
Bunlar da, insanların sosial
vəziyyətinə və ümumi iqtisadi duruma "təsir edəcək, beləcə indiyə qədər
Oyunlara xərclənən məbləğin büdcədə yeri görünəcək", təhlilçi əlavə edir.
"Həmçinin, neft gəlirlərinin
azalmasından asılı olaraq may ayının rəsmi rəqəmləri də göstərdi ki, aprel
ayına nisbətən vergi daxilolmalarda da kəskin azalma müşahidə edilib, təxminən
30 faizə qədər".
Onun sözlərinə görə, xərclərin bu
qədər çox olmasına rəğmən, çox cüzi hissəsinin geri dönüşü təmin olunacaq.
"Gözlənildiyi kimi, çox turist
axını da olmadı, gələnlərin əksəriyyətinin xərclərinin böyük hissəsini
Azərbaycan höküməti öz üzərinə götürdü, yəni turizm nöqteyi-nəzərindən də ciddi
bir qazanc əldə etmək mümkün olmadı, təəssüfki", Cəfərli bildirib.
Müsbət təsirlər
Azərbaycanın 2015-ci il iqtisadi
vəziyyətini Avropa Oyunlarına çəkilən xərclə heç bir əlaqəsi olmadığını deyən
iqtisadçı Vüqar Bayramova görə, bütün hallarda Oyunların Azərbaycan
iqtisadiyyatına, xüsusən turizm sektorunun inkişafı və ölkəyə daxil olan
valyutanın həcminin artması kimi müsbət təsirləri olub.
"Avropa Oyunlarının Azərbaycanın
təbliğindən əlavə, strateji bir məqsədi də var idi. Bu, ölkəyə sərmayenin cəlb
edilməsi idi. Xüsusilə turizm sektorunun bazasının yaradılması üçün. Bir turist
başqa turistin ölkəyə gəlməsi üçün potensial yaradır", cənab Bayramov BBC
Azərbaycancaya bildirib.
Bu baxımdan, cənab Bayramov
Oyunlardan sonra iqtisadiyyata qoyulan sərmayenin azalacağına inanmır.
"Avropa Oyunları bir təşəbbüs
idi ki, reallaşdı. Rəsmi açıqlamaya görə, 1 milyarddan da az miqdarda xərc
çəkilib, xərclərin də 78 faizi infrastruktura ayrılıb".
Ancaq BBC Azərbaycancanın apardığı
araşdırma Bakıda keçirilən ilk Avropa Oyunlarının xərclərinin 5 milyard manata yaxın olduğunu aşkar
edib.
Vüqar Bayramovun sözlərinə görə,
indi yaradılmış infrastrukturdan 2016-ci il Avropa Qran Prisi- Formula 1
yarışlarının, 2017-ci ildə İslam Həmrəylik Oyunlarının və 2017-ci ildə isə UEFA
Avropa Çempionluğu yarım final futbol oyunların təşkili zamanı istifadə
ediləcək ki, bu da strateji sərmaye gətirəcək.
"Çox qənaət və
lazımsız xərclərin ixtisarı"
Cənab Bayramov Azərbaycanın bu ilki
iqtisadiyyatını ilin birinci və ikinci yarısı kimi qruplaşdırmağı təklif edir.
O güman edir ki, sonuncu 6 ayda Maliyyə Nazirliyi büdcə vəsaitlərinə "çox
qənaət etməyə və lazım xərcləri ixtisar etməyə çalışacaq.
"Bütövlükdə isə, 2015-ci il
Azərbaycan iqtisadiyyatı üçün hər hansı təhlükə yoxdur", Bayramov qeyd
edir.
"Neftin qiyməti 65 dollarda
qalsa belə Maliyyə Nazirliyi gəlirlərlə xərclər arasındakı balansı qoruya
biləcək. Bu baxımdan geriləmə və ya risklər yoxdur", ekspert əlavə edir.
Natiq Cəfərli isə neftin qiymətində
azalma olacağını proqnozlaşdırır, "son günlərdə Brend markalı neft 1.6
faiz azalaraq 62 dollardan aşağı qiymətə satılıb".
Manatın məzənnəsi və
devalvasiya
Həmçinin, o iddia edir ki, iyunun
axırında İran və Altılıq ölkələri arasında baş tuta biləcək hər hansı anlaşma
ilə sanksiyaların götürülməsi neftin qiymətini daha aşağı sala bilər,
"hətta 50-55 dollara qədər". Bu isə, Cəfərlinin sözlərinə görə,
büdcəyə və manata "ciddi təzyiq edə bilər".
Əlavə amil isə, Mərkəzi Bankın iki
valyutalı səbətə keçməsi nəticəsində manatın məzənnəsinin "dollara
nisbətən ciddi asılılığa düşməsidir". Çünki, belə halda dünyada baş verən
avro ilə dolların məzənnəsinin münasibətlərinin dəyişməsi manata təsir
göstərməyə başlayıb, Cəfərli bildirir.
"Son bir neçə gündə avronun
məzənnəsində manata qarşı ucuzlaşma qeydə alınsa da, dollara nisbətən çox cüzi
də olsa artıb".
Ekspert ehtiyat edir ki, bu tendensiya davamlı ola bilər. Çünki Yunanıstan
1.6 milyard borcunu Avrozonaya ödəyə bilməzsə və Avrozonadan çıxarsa, avro
ucuzlaşacaq. "Nəticədə dollar bahalaşacaq ki, bu da manatın məzənnəsinə
təsir edə bilər".
Devalvasiyaya gəldikdə isə hər iki ekspert düşünür ki, Mərkəzi Bank ikinci
dəfə bu addımı atmaz.
"Manatın məzənnəsi inzibati yolla Milli Bank tərəfindən müəyyənləşir.
Tendensiyanı nəzərə alsaq, yaxın müddətdə devalvasiyaya getmək real
deyil".
Vüqar Bayramova görə, MB manatın məzənnəsini mövcud dəhliz daxilində,
(1.2-1.5) müəyyənləşdirməyə çalışacaq.
Fevral ayında Milli Bank ixracatı stimullaşdırılması üçün çevik məzənnə
siyasətinin tərkib hissəsi kimi devalvasiyaya-manatın dəyərinin dollara nisbətən 30 faiz
aşağı salınması barədə qərar verib.
MB rəhbəri Elman Rüstəmov bildirib ki, neft qiymətlərinin düşməsi
Azərbaycanın neftdən asılı iqtisadiyyatını sınaq qarşısında qoyduğu üçün ölkə
manatın dollara qarşı müəyyən etdiyi qiymətini tərk etməyi planlaşdırıb.
Комментариев нет:
Отправить комментарий