“Müharibə başlasa da, məktəbə
gedib-gəlirdik. Adi günlərdən biriydi. Yox, adi gün deyildi. 1992-ci il, 26
fevral, çərşənbə günüydü. Xocalı faciəsi baş verən
gecənin səhəri. Məktəbdə bütün dərslər boşuydu. Müəllimlərimiz iclasdaydılar. İkinci dərs vaxtı bütün müəllimlər ağlaya-ağlaya otaqdan çıxdılar. Bizə dedilər ki, gecə
çox pis hadisə olub. Tez
gedin evə,
çantalarınızdan kitablarınızı boşaldıb, qalın paltarlar və buterbrodlar doldurun.
Gücünüz çatacaq qədər. Çox ağır eləməyin. Evdə
sizi gözləyirlər”.
22 ildir Bakıda məcburi köçkünlük həyatı yaşayan Vüsalə Məmmədova
danışır. O, Ağdam şəhərində dünyaya gəlib.
Qarabağ müharibəsi
başlayanda 9-cu sinifdə
oxuyurmuş. Böyük bacısı Səadətlə birgə.
Kiçik bacısı Şəbnəm isə 5-ci sinifdəymiş.
“Həmin axşam ailənin
kişiləri qadınları və uşaqları Ağcabədinin Hindarx kəndinə apardılar. İki aya yaxın orda yaşadıq. Böyüklərimiz hər gün ordan işə
gedib-gəlirdilər. Anam həkimdi, poliklinikada işləyirdi. Həftədə
2 dəfə Ağdama işə gedirdi. Biz isə məktəbə getmirdik. Deyirdilər ki, Ağdamda məktəblər
boşdur. Heç kimin uşağı gəlmir
deyə dərslər keçilmir”.
Ağcabədi rayonuna gəlirlər. Burada bir qohumun evində kirayə yaşayırlar. Anaları yenə həftədə iki dəfə Ağdama işə gedib-gəlir. Uşaqlar isə Ağcabədi rayonunda 1 saylı məktəbə təhsillərinə davam edirlər.
“Özümüzü ilk dəfə “yad” hiss eləməyimiz xarici dil dərsində oldu. Müəllim
hansı xarici dili keçdiyimizi soruşdu. Biz Ağdamda fars dili keçirdik, müəllim bacımla mənə “Bu gündən
siz xarici dil dərslərindən azadsınız. Bu müvəqqəti çətinlikdir, tezliklə
öz evinizə qayıdıb, öz məktəbinizdə
fars dilini keçərsiniz. Mən sizə təzədən ingilis dili öyrədə bilmərəm”
dedi. Bundan sonra hər dəfə ingilis dili başlayanda biz sinfi tərk eləməli
olurduq. Bacım Səadət bütün fənlərdən
5 alırdı. Mən isə əlaçı olmamışam. Məktəbə 4 yaşımda getdiyimdən dəqiq
elmlər mənə ağır gəlirdi.
Humanitar fənlər daha rahatıydı”.
Bir il bu məktəbdə
oxuyurlar. Dərs ilinin
sonuna az qalmış, may ayında məktəbin direktoru qərar verir ki, hamı məktəbli forması geyinməlidir.
O vaxtlar məktəblərdə
vahid məktəbli forması olmasa da, şagirdlər ağ köynək, qara ətək geyinərdilər. Dərs ilinin bitməyinə 10-15 gün qalmış iki bacı məktəbdən
qovulurlar.
“Sonra anam qonşuluqda yaşayan
3 saylı məktəbin direktoru Tofiq müəllimgilə gedib xahiş etdi ki, bizi hələlik dərsə buraxsınlar. Kişi anamın
sözünü yarımçıq kəsmişdi
ki, bəlkə o uşaqlar böyüyüb böyük bir
adam olacaqlar. Müharibənin
belə vaxtında formaya görə uşaq dərsdən
qalacaq? Səhər gəlsinlər,
onları ən yaxşı sinfə qoyacam. Beləcə, 10-cu sinfi başa vurduq”.
Sonra Ağdam şəhəri erməni
silahlı qüvvələri tərəfindən işğal olur. 3 qız övladıyla
işsız qalan Gülçöhrə
Abbasova təkrar Bakıya,
qardaşıgilin yanına gəlir.
“Anam işə düzəldi, biz yeni məktəbə getdik. Bir neçə
aydan sonra sonra ayrı kirayə
evə köçdük, yenə məktəb
dəyişdik. Mən attestatımı alana qədər 5, kiçik bacım isə
7 məktəb dəyişdi. 11-ci sinfi bitirəndən
sonra sənədlərimi Mədəniyyət və
İncəsənət Universitetinə
verdim. Bura yeganə
universitet idi ki, xarici dildən
imtahan tələb olunmurdu. Birinci ili
qabiliyyət imtahanından kəsildim, ikinci il isə Dram və kino sənəti fakültəsinə daxil oldum”.
Müharibənin ağrılarını keçmişində qoymağa çalışan Vüsalə bir forma ucbatından məktəbdən qovulduğu gün özünə söz verir...
“Söz verdim müharibəyə qalib gələcəm, məhv
olmayacam. Müharibə bizə hər şeyə
rəğmən ayaq üstdə dayanmağı, bəzən haqqın olanları zorla əldə
etməyi, yanındakı
yaşıdına nimçədə təqdim olunan şeyləri
əzab-əziyyətlə
qazanmağı öyrətdi.
Ağdamda bir sinifdə
oxuduğum uşaqları illər
sonra sosial şəbəkələrdə tapıram. Məlum olur ki, müharibədən dolayı çoxu ali təhsil
ala bilməyib, bəzi qızlar ailənin yükünü yüngülləşdirmək üçün erkən
ailə qurublar. İndi
Lent.az internet portalında Qarabağ müharibəsində erməni əsirliyində olan insanların həyat hekayələrini yazıram. Atamı çox erkən itirmişəm, ailəmdə
müharibədə döyüşməyən
kişi olmayıb. Ermənilərlə döyüşməmişəm, amma müharibədən xəbərsiz insanlarımızla illərlə döyüşmüşəm”.
Azərbaycan Respublikası ərazilərinin
Ermənistan silahlı qüvvələri tərəfindən işğalı nəticəsində məruz
qalınan itki və tələfatların qiymətləndirilməsi üzrə
İşçi Qrupunun mətbuat
xidmətindən verilən məlumata
görə, müharibə nəticəsində 2 min 389 təhsil müəssisəsi
dağıdılıb. Ərazilərin
erməni silahlı qüvvələrinin nəzarəti altına keçməsi nəticəsində məcburi köçkün düşən
insanların 200 mindən
çoxu məktəbli olub. Təkcə Ağdam şəhərində 114 orta təhsil
məktəbi, 3 texnikum və 2 peşə məktəbində 31 minə
yaxın şagird və tələbə
təhsil alıb, 3500-ə yaxın müəllim çalışıb.
Azərbaycan Təhsil
Şurasının sədri Əjdər Ağayev deyir ki, müharibə nəticəsində doğma yurdlarını itirdikləri üçün məcburi köçkünlər müxtəlif rayonlarda yerləşdirilən zaman dövlət ilkin olaraq onların
yaşayışı ilə maraqlanıb.
“Birinci növbədə dövlət
onların yerləşdirilməsi və qidalanması məsələlərilə məşğul oldu. Qarşıda duran ikinci məsələ
isə qaçqın və məcburi köçkünlərin
təhsili idi. 90-ci illərin əvvəllərində sanatoriya və
yataqxanalarda yerləşdirilən məcburi köçkün şagirdlər üçün həmin
yerlərdə məktəb
təşkil olunmağa başladı.
Məqsəd uşaqların təhsildən kənar
qalmaması idi. Bu zaman təhsilin
keyfiyyətinin qayğısına
qalmaq mümkün deyildi. Mövcud imkanlar çərçivəsində davranmaq məcburiyyətindəydik. Müharibə
şəraitində bütün ölkənin vəziyyəti
yaxşı deyildi. Problemlər
çox, dövlət isə zəif idi. 99-cu ildən
sonra İslahat proqramı təsdiq
olundu. Bundan sonra məcburi
köçkünlər üçün ayrıca məktəblər
tikilməyə başladı”.
Şura sədri onu da qeyd edir ki, o illərdə təhsilin
məzmunu məsələsində də ortaya müxtəlif
problemlər çıxırmış.
“Xarici dil məktəblərdə müxtəlifdir. Bəzi
məktəblərdə
ingilis dili keçilir, bəzisində fransız və ya alman, ya da fars, ərəb. Tədris
fənni olaraq fransız
dilini keçmiş şagird müvəqqəti məskunlaşdığı yerin məktəbində bu dil üzrə
kadr yoxdursa çərtinliklə üzləşirdi. Belə
şagirdlər üçün ya özəl kurslar təşkil olunmalıydı, ya da o fənlər tədris
olunmamalıydı. O zaman Təhsil
Nazirliyi belə şəraiti nəzərə alaraq tənzimləmə
işi apardı. Xarici dildən
təlim almaq imkanı
olmayan şagirdə qiymət yazılmaması haqda qərar verildi. Bu faktorun həmin şagirdin ali məktəbə
girməsində nə mənfi
rolu vardı, nə müsbət. Xarici dil tədris olunmayan şagirdlər qəbul zamanı sənədlərini yalnız xarici dil tələb
olunmayan ali məktəbə təqdim
edə bilərdilər”.
XXI əsr Təhsil
Mərkəzinin rəhbəri
Etibar Əliyev isə
düşünür ki, 90-cı illərdə məcburi köçkünlərin
xarici dil tədrisindən azad edilməsi çox böyük yanlış idi.
“Məktəblərdə bütün fənlər üzrə müəllim
olmalıdır. Proqrama uyğun olaraq heç bir dərsin
ləğv olunması, yaxud tədrisinin dayandırılması yol
verilməzdir. Bu, təhsil haqqında qanuna da
ziddir. Çünki vətəndaşın tam şəkildə formalaşması üçün bütün fənlər
tədris olunmalıdır”.
“Bu günə qədər də xarici dil bilməməyimin əziyyətini
çəkirəm. Bu həmişə
mənə iş tapmaqda ciddi problemlər yaradıb. Elə layihələr
olur ki, baxırsan sənin
bacaracağın işdir. Görüşüb danışırsan, anlaşırsan. Axırda isə məlum olur ki, ofisin işçi dili ingilis dilidir”, -
Vüsalə Məmmədova deyir.
Qeyd: Material EPNK-in Avropa
Birliyinin maliyyəsi və International Alert təşkilatının dəstəyilə
həyata keçirilən "Eşidilməyən səslər" layihəsi çərçivəsində hazırlanıb. Materialın məzmumuna görə yalnız müəllif məsuliyyət
daşıyır və International
Alert, EPNK və donorların
mövqeyilə üst-üstə düşməyə
bilər.
http://civil-forum.az/meqaleler/726-thsildn-azad-olanlar.html
Комментариев нет:
Отправить комментарий