Çərşənbə günü Azərbaycan hava məkanını pozduğunu dediyi və
"Ermənistan Respublikası Silahlı Qüvvələrinə" məxsus hərbi
helikopteri vurduqdan sonra beynəlxalq qurumlar hər iki tərəfi təmkinli olmağa
çağırıblar.
Münaqişənin həllində vasitəçi olan Minsk Qrupu Həmsədrləri
təmas xəttində helikopterin vurulması barədə "çox ciddi narahatlıq"
keçirdiyini bildirib. "Həmsədrlər bu insidentə səbəb olan hadisələr barədə
dərin narahatdırlar", bəyanatda deyilir.
Amerikalı həmsədr James Warlick isə öz Twitter səhifəsində
yazıb: "Dağlıq Qarabağda daha geniş münaqişə heç kimin marağında deyil. Tərəflər
vəziyyətin gərginləşməsinə imkan verməməli və müharibədən bir variant kimi
imtina etməlidirlər".
Avropa İttifaqının Xarici Siyasət üzrə xidmətinin bəyanatında
isə hər iki tərəfin təmkinli olmasına və insidentin araşdırılmasına çağırıb.
"Avropa İttifaqı təkrar edir ki, ATƏT Minsk Qrupunu və üç Həmsədri tam şəkildə
dəstəkləyir. Hər iki tərəf atəşkəsə qəti surətdə hörmət etməlidir", bəyanatda
deyilir.
Bu arada Azərbaycan Xarici İşlər Nazirliyi bəyan edib ki,
işğal olunmuş ərazilərin üzərindəki hava məkanı "uçuşlar üçün bağlı"
elan edib, bu barədə beynəlxalq mülki aviasiya təşkilatının bütün üzvlərini məlumatlandırıb.
"Ermənistana məxsus hərbi helikopterlərin Azərbaycanın
hava məkanına qeyri-qanuni soxulması Ermənistanın Azərbaycana qarşı işğal və təcavüzünün
və Azərbaycanın ərazi bütövlüyü və suverenliyinə qarşı zordan istifadə siyasətinin
davamıdır", XİN bəyanatında deyilir.
"Bu gün biz atəşkəsin yenidən pozulmasının şahidi
olduq. Helikopterin məhv edilməsi zorakılığın təhükəli təzahürüdür”, -
Kollektiv Təhlükəsizlik Müqaviləsi Təşkilatının (KTMT) baş katibi Nikolay
Bordyuja deyib.
Hadisə barədə məlumat yayılandan az sonra ATƏT-in baş
katibi hadisə ilə bağlı bəyanat yayıb. "Dağlıq Qarabağda erməni hərbi
vertolyotunun vurulması bu dondurulmuş münaqişənin daha da gərginləşməsinə gətirə
bilər", Lamberto Zannier deyib.
Çərşənbə günü təyyarənin vurulması nəticəsində üç pilotun
öldüyü və vertolyotun yandığı bildirilir. Minsk Qrupunun həmsədrləri İqor Popov
(Rusiya), James Warlick (ABŞ) və Pierre Andrieu (Fransa) yaydıqları bəyanatda
ölənlərin ailələrinə başsağlığı verib.
Azərbaycan Müdafiə Nazirliyinin saytındakı məlumatda
deyilir ki, "Mi-24 tipli helikopter döyüş kursuna enərək mövqelərimizə
hücuma cəhd edib".
"Bu, hadisələrin gözlənilməz eskalasiyasıdır və Azərbaycan
üçün nəticələr ağır olacaq", Ermənistan Müdafiə Nazirliyinin sözçüsü
Artsrun Hovhannisyan bəyan edib.
"Vertolyotun qalıqlarının öyrənilməsi onun göyərtəsində
silahın olmadığını təsdiq etmək imkanı verəcək. Azərbaycan tərəfindən vəziyyətin
gərginləşdirilməsi hətta vertolyot düşdükdən sonra davam edib", Artsun
Hovhannisyan Facebook səhifəsində yazıb. "Bundan əlavə, Azərbaycan tərəfi
atəşi davam etdirərək pilotlara yaxınlaşmağa imkan verməyib".
Hadisə noyabrın 12-də saat 13:45 radələrində cəbhənin
Ağdam rayonunun Kəngərli kəndindən 1700 metr şimal-şərq istiqamətində baş
verib, saytda yazılıb. Tanınmamış "Dağlıq Qarabağ Respublikası" Mi-24
helikopterinin vurulduğunu təsdiqləyib. Hadisənin baş verdiyi ərazinin Azərbaycan
və Erməni qoşunlarının təmas xəttinə yaxın olduğunu bildirilir.
http://www.bbc.co.uk/azeri/azerbaijan/2014/11/141113_azerbaijan_armenia_statements
Комментариев нет:
Отправить комментарий