Torpaqlarımızın ermənilər tərəfindən işğalı nəticəsində
1 milyondan artıq insan qaçqın və məcburi köçkün həyatı yaşayır. Qaçqın və məcburi
köçkünlərin sosial müdafiəsinin gücləndirilməsi prioritet istiqamətlərdəndir.
Ölkədə qaçqın və məcburi köçkünlərin həyat şəraitinin yaxşılaşdırılması istiqamətində
görülən işlər, bu kateqoriyadan olan soydaşlarımızın hər zaman dövlətin diqqət
və qayğısı ilə əhatə olunduğunu göstərir. Qaçqınların və məcburi köçkünlərin həyat
şəraitinin yaxşılaşdırılması istiqamətində həyata keçirilən siyasətin nəticəsidir
ki, 1993-cü ildən başlayaraq ulu öndər Heydər Əliyev tərəfindən bu istiqamətdə
81 fərman və sərəncam imzalanıb. Həmçinin Nazirlər Kabinetinin 307 qərarı var,
Milli Məclis tərəfindən 24 qanun qəbul edilib. Həmçinin ötən dövr ərzində bu
istiqamətdə Prezident İlham Əliyev tərəfindən 49 fərman və sərəncam imzalanıb.
Eləcə də iki dövlət proqramı və onlara edilən əlavələr təsdiq edilib.
Məcburi köçkünlər arasında yoxsulluq
səviyyəsi 15 faizədək azalıb
Ölkə başçısının yürütdüyü siyasətin təməl prinsiplərindən
olan qaçqın və məcburi köçkünlərin həyat şəraitinin yaxşılaşdırılması ilə bağlı
tədbirlərin nəticəsidir ki, bu gün ölkədə bir dənə də olsun çadır şəhərciyi
qalmayıb, bu insanların hamısı müasir tipli qəsəbələrə köçürülüb. Onların maddi
rifahının yaxşılaşdırılması üçün dövlət proqramları qəbul edilib, sosial müavinətlərin
artırılması istiqamətində mühüm tədbirlər görülüb. Respublikanın bir çox yerlərində
salınan bu qəsəbələr bir reallığı da ortaya qoyur ki, Azərbaycan dövləti hər
zaman öz vətəndaşlarının qayğısına qalır, onların problemlərinin həlli həyata
keçirilən siyasətin mühüm istiqamətini təşkil edir. Prezident İlham Əliyev öz
çıxışı zamanı bu istiqamətdə tədbirlərin davam edəcəyini bildirib: “Biz elə etməliyik
ki, bu gün uşaq bağçalarında, məktəblərdə, hərbi hissələrin ərazilərində
yaşayanlar üçün daha yaxşı şərait yaradaq. 2014-cü ildə də bu siyasət davam
etdirilir”.
Bu istiqamətdə həyata keçirilən tədbirlərdən
biri kimi cari ilin 1 may tarixinə 50 minə yaxın ailə üzvünü əhatə edən 12 229
qaçqın və məcburi köçkün ailəsinə ünvanlı yardım ödənilir. Bununla yanaşı,
qaçqın və məcburi köçkünlərdən 35 702 nəfərinə sosial müavinət, 3698 nəfərinə təqaüd,
1476 nəfərinə birdəfəlik müavinət ödənilir. Aparılan kompleks işlərin nəticəsi
kimi, Azərbaycanda məcburi köçkünlər arasında yoxsulluq səviyyəsi 15 faizədək
azalıb”.
Dövlət başçısının diqqət və qayğısı nəticəsində
qaçqın və məcburi köçkünlər üçün 82 müasir qəsəbə və məhəllə salınıb, 180 min nəfərin
mənzil-məişət şəraiti yaxşılaşdırılıb. Lakin hələ də çətin şəraitdə yaşayan məcburi
köçkünlər var və onların da mənzil-məişət şəraitinin yaxşılaşdırılması istiqamətində
işlər davam etdirilir, bu problem mərhələli şəkildə həll olunur. Qeyd edək ki,
bu istiqamətdə görülən tədbirlərdən biri kimi Abşeron rayonunun Masazır qəsəbəsində
760 məcburi köçkün ailəsi üçün yeni salınmış məhəllə istifadəyə verilib. Bundan
başqa Bakının Qaradağ rayonunun Müşfiqabad qəsəbəsində 1440 məcburi köçkün ailəsi
üçün yeni salınmış məhəllə istifadəyə verilib. Bu məqsədlə Bakı Dövlət
Universitetinin (BDU) tələbə yataqxanalarında yerləşən məcburi köçkünlər
köçürülüb. Məhəllə, Müşfiqabad qəsəbəsi ərazisində Prezident İlham Əliyevin
2004-cü il tarixli sərəncamı ilə təsdiq edilmiş “Qaçqınların və məcburi köçkünlərin
yaşayış şəraitinin yaxşılaşdırılması və məşğulluğunun artırılması üzrə Dövlət
Proqramı”na Prezidentin 2007-ci il tarixli sərəncamı ilə təsdiq edilən əlavələrin
müvafiq bəndlərinə əsasən, inşa olunub. Burada yaşayan məcburi köçkün ailələrindən
320-si Ağdam, 570-i Cəbrayıl, 290-ı Füzuli, 100-ü Zəngilan, 160-ı isə işğal
olunmuş digər rayonlardandır. Məhəllənin ərazisi 22 hektardır. Buradakı 1440 mənzildən
211-i birotaqlı, 659-u ikiotaqlı, 429-u üçotaqlı, 141-i isə dördotaqlıdır. Məhəllədə
140 yerlik uşaq bağçası da inşa olunub. Zəruri avadanlıqla təchiz olunan
bağçada balacaların təlim-tərbiyəsi üçün bütün tələblər nəzərə alınıb. Ərazidə
klub-icma mərkəzi, inzibati bina, təcili yardım stansiyası, poçt şöbəsi və iki
çıxışlı yanğınsöndürmə deposu da tikilib.
Qaçqınların və Məcburi Köçkünlərin İşləri üzrə
Dövlət Komitəsinin sədri Əli Həsənovun sözlərinə görə, qaçqın və məcburi
köçkünlərin həyat şəraitinin yaxşılaşdırılması prosesi növbəti illərdə də davam
etdiriləcək. Belə layihələrdən biri kimi Qobuda məcburi köçkünlər üçün tikiləcək
yeni böyük yaşayış massivində 10 mikrorayon olacaq. Hər bir mikrorayon 9000 nəfər
əhali üçün nəzərdə tutulub. Yaşayış massivində ümumilikdə 204 ədəd yaşayış
binası tikiləcək. Ərazidə 1200 yerlik 10 məktəb, 10 uşaq bağçası, uşaq-gənclər,
səhiyyə, ictimai iaşə, mədəniyyət müəssisələri, bədən tərbiyəsi və idman
qurğuları tikiləcək. Ə. Həsənov qeyd edib ki, tikiləcək yeni yaşayış massivi ən
son standartlara cavab verəcək, istilik, elektrik, su təminatı ilə tam təchiz
olunacaq. Yaxın 2-4 il ərzində Qobuda tikiləcək yaşayış massivinə 90 min məcburi
köçkün köçürüləcək. Komitə sədri onu da bildirib ki, yaxın 2-4 il ərzində Bakı,
Sumqayıt və Abşeron yarımadasında müvəqqəti məskunlaşan bütün məcburi köçkünlər
Abşeron rayonunda, Qobu bələdiyyəsinin ərazisində inşa ediləcək yeni böyük
yaşayış massivinə köçürüləcək. Onun sözlərinə görə, hazırda Bakı, Sumqayıt və
Abşeron yarımadası ərazisində ümumilikdə 300 mindən çox məcburi köçkün yaşayır.
Yeni yaşayış massivi 90 000 məcburi köçkün üçün nəzərdə tutulub. Bu, ümumilikdə
20 434 ailə deməkdir. Komitə sədrinin sözlərinə görə, qaçqın və məcburi köçkünlərin
53%-i, yəni 500 minə qədəri qadındır. Son 20 ildə təkcə 150 min qız uşağı məcburi
köçkün kimi dünyaya göz açıb.
Yeni tikilən
qəsəbələrdə Gənclər evi inşa edilməlidir
Qaçqın və Məcburi Köçkün Gənclər Təşkilatının sədri
Vüqar Qədirov isə bildirdi ki, Azərbaycan torpaqlarının Ermənistan silahlı qüvvələri
tərəfindən işğalı nəticəsində yaranan 1 milyondandan artıq qaçqın və məcburi
köçkünlərin problemi əsas prioritet istiqamətlərindən biri kimi qalmaqdadır:
“Prezident İlham Əliyevin qaçqın və məcburi köçkünlərin problemlərinin həlli
istiqamətində imzaladığı fərman və sərəncamlar, həyata keçirilən layihələr,
qaçqınların və məcburi köçkünlərin məskunlaşması və məşğulluğunun artırılması
üzrə dövlət proqramının icrası məqsədilə salınan yeni, müasir yaşayış kompleksləri
və s. onu deməyə əsas verir ki, bu sahədə işlər uğurla davam etdirilməkdədir. Məcburi
köçkünlərin, istifadə etdiyi kommunal xərclərin dövlət tərəfindən ödənilməsi,
onlara aylıq müavinətlərin verilməsi, məcburi köçkün tələbələrin dövlət ali və
orta ixtisas təhsil müəssisələrində təhsil haqqından azad olmaları və.s bu təbəqənin
insanlarına diqqət və qayğının bariz nümunəsidir”. V.Qədirovun sözlərinə görə,
istər qaçqın və məcburi köçkünlərin, istərsə də əhalinin sosial cəhətdən
qayğıya ehtiyacı olan digər təbəqələrin problemlərinin həlli istiqamətində müxtəlif
dövlət proqramları həyata keçirilir: “Amma sirr deyil ki, bu sahədə həllini
gözləyən problemlər hələ də qalmaqdadır. 1-ci məcburi köçkünlərin həyat şəraitinin
yaxşılaşdırılması, onların sosial problemlərinin aradan qaldırılması istiqamətində
işlər başa çatmayıb, bu işlər dövlətin prioriteti olaraq qalmaqdadır. Şəhid ailələrinə,
müharibə və digər kateqoriyadan olan əlillərə, valideyn himayəsindən məhrum
olan uşaqlara, kimsəsizlərə, qocalara və s. dövlət tərəfindən göstərilən qayğı
prioritet olaraq qalır və hər il yeni proqramlar və layihələr həyata keçirilir.
Bu istiqamətdə müxtəlif sahəvi QHT-lərlə istər
Milli Məclis, istərsə də müxtəlif dövlət və hökumət orqanlarının qarşısında təkliflərlə
çıxış edirik. Belə ki, gənc ailələrin mənzil-məişət şəraitinin
yaxşılaşdırılması(ipoteka kreditlərinin sadələşdirilməsi və s.) yeni iş yerlərinin
açılması, yeni tikilən qəsəbələrdə Gənclər evlərinin inşası, və.s əsas
prioritetlərdəndir”.
O da vurğulandı ki, bu gün onlar istər, dövlətqaçqınkoma,
istər Gənclər və İdman Nazirliyinə yeni təkliflər hazırlayır. Bu təkliflər
arasında gənclərin asudə vaxtlarının səmərəli təşkili, istedadlı və yaradıcı gənclərə
məskunlaşdıqları ərazilərdə tikilən qəsəbələrdə şərait yaradılması və idman
zallarının tikilməsi və s. var. Mövcud problemlərə gəldikdə isə bildirildi ki,
məcburi köçkünlərin səhiyyə problemlərinin həlli istiqamətində qarşıya çıxan
problemlər, bir sıra xəstəxanalarda məcburi köçkünlərə edilən güzəştlərə əməl
edilməməsi, şəhid ailələrinə, valideyn himayəsindən məhrum olan tələbələrə bəzi
təhsil müəssisələrində göstərilən ögey münasibət və s. kimi amillər aradan
qaldırılmalıdır.
Beləliklə, bu gün qaçqın və məcburi köçkünlərin,
əhalinin sosial cəhətdən qayğıya ehtiyacı olan təbəqələrinin problemlərinin həlli
ilə bağlı həyata keçirilən tədbirlər davam etdirilir. Ölkə başçısı da bildirib
ki, gün gələcək biz ərazi bütövlüyümüzü bərpa edəcəyik və ondan sonra
dağıdılmış şəhərləri yenidən quracağıq, bərpa edəcəyik: “Azərbaycanlılar öz
doğma torpaqlarında yaşayacaqlar, yaşamalıdırlar. Bununla bərabər, biz
soydaşlarımız üçün müvəqqəti olaraq belə gözəl binalar tikirik. Ancaq bu, müvəqqəti
yaşayış yeridir. Bu yerlərdə hələ ki, siz yaşamalısınız və müvəqqəti də olsa şərait
yaxşı olmalıdır”.
Nigar Abdullayeva
"Azərbaycan Respublikasının Prezidenti
yanında Kütləvi İnformasiya Vasitələrinin İnkişafına Dövlət Dəstəyi Fondunun 22
iyul Milli Mətbuatın yaranmasının 139 illiyi ilə əlaqədar Elan etdiyi müsabiqəyə
təqdim etmək üçün”
http://palitranews.az/news.php?id=24206
Комментариев нет:
Отправить комментарий