Dünya bazarında neft qiymətlərinin
uzun müddət aşağı qalması iqtisadiyyatı neftdən asılı olan ölkələrdə, o
cümlədən Azərbaycanda büdcə xərclərinə yenidən baxılmasını gündəmə gətirib.
Bu isə, öz növbəsində, xərclərin
səmərəliliyi və struktur islahatlarının aparılması barədə
yeni suallar ortaya qoyur.
BBC Azərbaycancaya danışan təhlilçilər
yeni sualların cavabı kimi dövlət qurumlarının sayının azaldılmasını labüd hesab
edirlər.
Millət vəkili
Vahid Əhmədov deyir ki, Azərbaycanda struktur islahatları "mütləq"
keçirilməlidir.
"... Dövlət
büdcəsindən maliyyələşən nazirliklərin, komitələrin, şirkətlərin sayı həddən artıq çoxdur. Bunları kəskin azaltmağa ehtiyac var...bilirsiniz, dünyada
neftin qiyməti kəskin aşağı düşüb, dövlət büdcəsinə
daxilolmalarda problemlər var. Müəyyən
qurumlar ya birləşdirilməli, ya da tamamilə ləğv edilməlidir",
- cənab Əhmədov deyir.
İndiyə qədər
aparılan islahatlardan danışan millət vəkilinin
sözlərinə görə, struktur islahatları birbaşa Azərbaycanın dövlət
başçısının səlahiyyətində olan məsələdir və bütün islahatlara o rəhbərlik edir.
Lakin Milli Məclis
hökümətin belə qərarlarını müzakirə edə və məsləhət
verə bilər.
"Elə bu
yaxınlarda Dövlət Torpaq və Xəritəçəkmə Komitəsi ləğv edildi. Azərenerjinin səlahiyyətləri alındı və “Azərİşıq” adlı böyük birlik yaradıldı", cənab Əhmədov bildirib.
Həmçinin, Sərhəd
Xidməti Milli Təhlükəsizlik Nazirliyinin tərkibində idi, sonralar əlaqələr
genişləndiyindən belə bir xidmət yaradılıb.
Bundan başqa Əmlak Komitəsi yaranmazdan əvvəl onun funksiyasını İqtisadi
İnkişaf Nazirliyinin tərkibində olan bir qurum yerinə
yetirirdi.
“Elə indi də Əmlak Komitəsi kimi bir qurumun saxlanmasına o qədər
ehtiyac yoxdur. Onu İqtisadi İnkişaf Nazirliyinə birləşdirmək
olar.”
Lakin onun sözlərinə görə,
islahatlardan əvvəl tədqiqatlar, analizlər aparılmalıdır. Çünki, islahatlar elə
aparılmalıdır ki, onların nəticəsində Azərbaycanın
dövlət büdcəsinə əlavə vəsaitlər daxil olsun və təkrarlama prosesi aradan
qalxsın.
Sabiq deputat, iqtisadçı Nazim Məmmədov
isə, qonşu ölkələrin islahat təcrübəsini misal gətirir.
"Ağır yük"
Ukrayna, Polşa və
Gürcüstanda Nazirlər Kabineti 20-dək dövlət strukturunu əhatə
edir. Azərbaycanda isə Nazirlər Kabinetində 40-dan artıq qurum var - bir baş nazir, altı müavin, iyirmiyə
yaxın nazirlik, 15-16 dövlət komitəsi və mərkəzi
icra hakimiyyəti orqanları – o deyir.
“Bu qədər
böyük bir makina təbii ki, balaca bir iqtisadiyyat üçün ağır bir yükdür. İlk növbədə,
Nazirlər Kabinetinin bu strukturuna əl gəzdirmək lazımdır”,
- cənab Məmmədov deyir.
Onun sözlərinə görə,
islahata cəlb ediləsi qurumlardan biri Meliorasiya və Su Təsərrüfatı
Səhmdar Cəmiyyəti ola bilər. Çünki, "yüz milyonlarla manat vəsait bu səhmdar
cəmiyyətə dövlət investisiyası olaraq verilir, hərçənd ki,
torpaqlarıının şoranlaşması davam edir və o torpaqlar kənd təsərrüfatı
dövriyyəsindən çıxarılır."
Lakin bunu qurumu Kənd Təsərrüfatı
Nazirliyi ilə birgə ləğv edərək yeni bir qurumda birləşdirmək lazımdır.
O, Sosial Müdafiə
Fondunun ləğv edilərək Əmək və Sosial Müdafiə Nazirliyinə verilməsinin də tərəfdarıdır.
“Çünki bu qurum özü-özünü maliyyələşdirmir.
Mən müşahidə aparmışam. Bu qurum 2006-cı ildə dövlət
büdcəsindən 275 min manat dotasiya alırdı, indi onun aldığı dotasiya 1 milyard
manatdan yuxarıdır. Əslində isə bu
qurum özü özünü maliyyələşdirməlidir".
Vergilər
"Əmək
haqqından Sosial Müdafiə Fonduna 25 faiz vergi tutulur. Bura 14 faizlik gəlir
vergisini də əlavə edəndə ümumilikdə 39 faiz edir. Qonşu Gürcüstanda da əvvəllər
belə idi. Bir neçə il əvvəl bu vergiləri birləşdirərək “sosial vergi” adı ilə 20 faiz müəyyən
ediblər", Nazim Məmmədv deyir.
Cənab Məmmədov
bildirib ki, nəticədə indi Gürcüstanda büdcə gəlirlərinin
94 faizi vergilər hesabına formalaşır. Azərbaycanda bu göstərici 36 faizdir.
Nazim Məmmədovun
sözlərinə görə, belə islahatları yeni kadrlar həyata keçirməlidir, nəinki
"Sovet İttifaqından qalmış planlı iqtisadiyyatda çalışanlar" yox.
Nazim Məmmədov
hesab edir ki, Azərbaycan bir neft ölkəsi olaraq “tənbəlləşməkdən
çıxmalı”, daha mobil iqtisadi siyasət yürütməli,
dövlət özünün özəl sektora müdaxiləsini aradan qaldırmalı, hökumət özəl
sektora dəstəyi daha da artırmalıdır.
Onun sözlərinə görə,
Prezident Əliyev “həmişə bu dəstəyi nümayiş etdirir, bu barədə danışır”.
Lakin onun qənaətinə görə,
bu, deklarasiyadan o yana keçmir.
http://www.bbc.co.uk/azeri/azerbaijan/2015/03/150316_azerbaijan_bureaucratic_reforms
Комментариев нет:
Отправить комментарий