Press-reliz: Avropa Azərbaycan
Cəmiyyətinin (AAC/TEAS) Belçikadakı nümayəndəliyi və Avropada Gənc Azərbaycanlı
Peşəkarlar Assosiasiyası (AYAPE) 20 iyun - BMT-nin Dünya Qaçqınlar Günü münasibətilə
tarixi dəyirmi masa təşkil edib ki, bu da Avropa Parlamentində bu tarixin qeyd
edildiyi yeganə tədbirdir.
Müzakirələrin moderatoru,
Avropa Parlamentinin Almaniyadan olan üzvü Hiltrud Breyer (Yaşıllar Partiyası)
Ermənistan-Azərbaycan, Dağlıq Qarabağ münaqişəsinin qurbanları olan 875 min azərbaycanlı
qaçqın və məcburi köçkünün davam etməkdə olan acınacaqlı vəziyyətindən söz
açıb.
Azərbaycanın Avropa
İttifaqındakı (Aİ) səfiri cənab Fuad İsgəndərov çıxışında deyib: “Dağlıq
Qarabağ münaqişəsi Azərbaycan cəmiyyətinə təsir edən ən ciddi məsələdir. Azərbaycan
hökuməti qaçqın və məcburi köçkünlərin həyat şəraitinin yaxşılaşdırılmasına kömək
üçün bu problemə böyük diqqət ayırır. Qaçqın düşərgələri Azərbaycanın 76
inzibati rayonuna yayılıb. Keçən il qaçqın və məcburi köçkünlərin həyat şəraitini
yaxşılaşdırmaq üçün Azərbaycan Dövlət Neft Fondunun xəzinəsindən 300 milyon AZN
(224,9 milyon funt-sterlinq) vəsait ayrılıb.
Mən buradakı gənc azərbaycanlılardan
israrla tələb edirəm ki, Ermənistanın qeyri-qanuni işğalının Azərbaycana
vurduğu zərbəni təbliğ etsinlər.
Avropa təsisatlarında
çalışanların bu mövzunu unutmaması üçün əlimizdən gələni etmək bizim öhdəmizdədir.
Bu insanların hüquqları pozulmaqda davam edir. Avropa Parlamentinin qəbul
etdiyi və bu işğalı pisləyən qətnamənin də hələ heç bir nəticəsi yoxdur. Biz
özümüz və qonşumuz Ermənistan üçün daha yaxşı gələcək yaratmaq istəyirik”.
ATƏT-in Münaqişələrin Önlənməsi
Mərkəzinin rəhbərinin keçmiş müavini, hazırda Belçika Xarici İşlər Nazirliyində
təhlükəsizlik məsələləri üzrə məsul şəxs olan Paskal Heyman münaqişədən doğan
sosial problemləri analiz edərək deyib: “Azərbaycan statistikasına görə, keçən
10 il ərzində qaçqın və məcburi köçkünlər arasındakı yoxsulluq səviyyəsi 75
faizdən 18 faizə enib. Bununla belə bu səviyyə əhalinin digər hissəsinə nisbətən
geri qalır. Köçkünlük ATƏT üçün hər zaman narahatlıq hesab olunub, çünki bu, həmişə
qeyri-sabitliyə aparıb çıxarır. ATƏT-in Minsk Qrupu əhalinin əvvəllər məskun
olduğu yerə qayıda bilmək hüququnu dəstəkləyir. Bununla belə atılacaq
addımlarda məhdudiyyətlər də özünü göstərir, çünki münaqişə hələ də həll
olunmamış qalır. Bu da situasiyanı dəyişdirmir”.
İslam Konfransı Təşkilatının
Avropa İttifaqı yanındakı missiyasının rəhbəri, səfir cənab Arif Məmmədov
bunları bildirib: “İslam Konfransı Təşkilatı digər təşkilatlara nisbətən Dağlıq
Qarabağ münaqişəsi ilə əlaqədar Azərbaycanı dəstəkləyən daha çox qətnamə qəbul
edib. Ümid edirik ki, münaqişə həll olunanda qaçqınlar və məcburi köçkünlər cəmiyyətə
yenidən inteqrasiya olunacaqlar və Aİ də onların təhsilinə kömək üçün layihələri
artıracaq. Aİ-nin həm də qarışıq azərbaycanlı-erməni ailələri üçün layihələri
var.
Dağlıq Qarabağda bu cinayətləri
törətmiş insanların Ermənistan hökumətində ən yüksək səviyyəyə qalxması qəbuledilməzdir.
Ermənistan rəhbərlərinin demək olar ki, hamısı mənşəcə Dağlıq Qarabağdandır.
Beynəlxalq ictimaiyyət bu situasiyanı daha diqqətlə analiz etməlidir. Azərbaycan
qaçqın və məcburi köçkünlər üçün çoxlu dövlət proqramları həyata keçirib, lakin
onlar yenə də öz yurd-yuvalarına qayıtmaq istəyirlər. Ümid edirəm ki, Avropa
Parlamenti bu vəziyyətə daha diqqətlə yanaşacaq və bu əzab-əziyyətə bais
olanları cəzalandıracaq”.
Azərbaycan Respublikasının
NATO yanında nümayəndəliyinin başçısı, səfir cənab Xəzər İbrahim öz çıxışında
bunları söyləyib: “Bu insanlar öz torpaqlarına qayıtmalıdır. İstər Dağlıq
Qarabağ və 7 ətraf rayonda, istərsə də Ermənistanda yaşamış olanlar əgər əvvəlcədən
orada yaşayıblarsa, ora da qayıtmalıdırlar. Mülkiyyətindən məhrum olmuş
insanlar arasında həmişə radikallaşma riski var, amma bu hal azərbaycanlı
qaçqın və məcburi köçkünlərə xas deyil. Ümid edirəm ki, bir gün onlar mənim ölkəmi
NATO-da təmsil edəcəklər. Bir də ümid edirəm ki, dəyirmi masa kimi belə tədbirlərə
ehtiyac qalmayacaq, çünki Azərbaycanda qaçqın və məcburi köçkün olmayacaq”.
Aİ-nin Cənubi Qafqaz və
Gürcüstan böhranı üzrə xüsusi nümayəndəsinin siyasi məsləhətçisi Atanas Baltov
deyib: “Aİ belə böhranların həllinin və bütün dünyadakı qaçqın və məcburi
köçkünlərin öz evlərinə qayıda bilmələrinin tərəfdarıdır. Lakin Dağlıq Qarabağ
münaqişəsinə ATƏT-in Minsk Qrupunun formatına uyğun yanaşılır.
Zərərçəkən əhalinin təhsilinin
keyfiyyətini təkmilləşdirmək üçün Azərbaycanın Aİ mexanizmlərindən istifadə etmək
imkanı var. Azərbaycan həm də Dağlıq Qarabağ münaqişəsinin sülh yolu ilə həlli
üçün Avropa Tərəfdaşlığı kimi mülki cəmiyyət proqramlarının əhəmiyyətini və status-kvo
dözülməzliyini qəbul edir”.
Avropa Azərbaycan Cəmiyyətinin
baş müşaviri, Avropa Komissiyasının keçmiş direktoru; Saraqosa Universitetinin
siyasi iqtisadiyyat elmləri üzrə professoru Manuel Arnal öz çıxışında bunları
bildirib: “Problemlərdən biri ATƏT-in Minsk Qrupunun tərkibidir. 20 ildir ki,
aparılan müzakirələrin heç bir nəticəsi yoxdur. Qaçqın və məcburi köçkünlər
münaqişənin qurbanlarıdır və Azərbaycan ərazisinin təxminən 20 faizi hərbi
işğal altındadır”.
AYAPE İdarə Heyətinin üzvü
Yalçın Məmmədov isə bunları söyləyib: “Mən özüm məcburi köçkünəm. Dağlıq
Qarabağda kiçik bir Azərbaycan şəhəri olan Ağdamda anadan olmuşam. Bu şəhər
münaqişə zamanı viran qoyulub. BMT-nin Qaçqınlar üzrə Ali Komissarlığı bu
yaxınlarda bəyan etdi ki, II dünya müharibəsi bitəndən bəri 51 milyon insan
yurd-yuvasından məhrum olub. Malik olduğu qaçqın və məcburi köçkünlərin sayı və
nisbəti Azərbaycan kimi kiçik bir ölkə üçün həddən artıq böyükdür. Heç kəs öz
seçiminə əsasən qaçqın və ya məcburi köçkün deyil. Qaçmağı və sağ qalmağı
bacaranlar qəhrəmandır”.
Tədbirə Avropa Azərbaycan Cəmiyyətinin
Belçikadakı nümayəndəliyinin rəhbəri Roman Huna yekun vurub: “Avropa Azərbaycan
Cəmiyyəti bu vəziyyəti təbliğ etmək üçün həmişə iyunun 20-də görüşlər təşkil
edir. Qaçqın və məcburi köçkün böhranı qlobal səviyyədədir. Azərbaycan əhalisi
münaqişə həll edilmədən evlərinə qayıda bilməz, lakin 20 illik atəşkəs və
danışıqlardan sonra hələ də heç bir nailiyyət əldə edilməyib.
Ümid edirəm ki, yeni Avropa
Komissiyası bu münaqişəyə diqqət yetirəcək. Aİ və ATƏT kimi beynəlxalq təşkilatlar
burada əsas rol oynayır. Bu insanlar üçün əsas qayə öz evlərinə qayıda bilməkdir”.
http://teas.eu/az/press-release-azerbaijani-idps-and-refugees-highlighted-european-parliament
Комментариев нет:
Отправить комментарий